An article about the significance of positive thoughts in a person’s life, particularly for parents and caregivers of children.
ကလေးငယ်လေးတွေကို စောင့်ရှောက်နေရတဲ့ ဖေဖေ၊ မေမေနဲ့ အုပ်ထိန်းသူတို့ရေ …
တခါတလေမှာ စိတ်ညစ်ညူးစရာ၊ ဝမ်းနည်းစရာအတွေးတွေ ဝင်ဖူးကြတယ်မဟုတ်လား။ “ငါဟာ မိဘကောင်း တစ်ယောက်မှဟုတ်ရဲ့လား”၊ “အလုပ်အကိုင်တွေကလည်း အဆင်မပြေတော့ သားသားမီးမီးတွေကို အစားကောင်း၊ အသောက်ကောင်းတွေလည်း မကျွေးနိုင်ပါလား”၊ “ငါ့ကလေးတွေကို တခြားကလေးတွေလို ကျောင်းပုံမှန်သွားရအောင် မလုပ်ပေးနိုင်ပါလား” … စသည်ဖြင့် အမျိုးမျိုးသောအတွေးတွေဟာ ခေါင်းထဲမကြာခဏ ဝင်လာပြီး မပျော်ရွှင်နိုင်ဖြစ်နေရတယ်ဆိုရင်တော့ - ဒီစာလေးထဲက နည်းလမ်းတွေနဲ့ မကောင်းတဲ့အတွေးတွေကို ဖယ်ထုတ်နိုင်ဖို့ ကြိုးစားကြည့်ကြမယ်လေ။
ဒီလိုအတွေးတွေဝင်တာဟာ လူသားတိုင်းရဲ့ ပုံမှန်ခံစားမှုတစ်ခုပါပဲ။ မကောင်းတဲ့ အခြေအနေတွေကြားမှာ နေထိုင်နေရသူတွေအဖို့ ပိုလို့တောင်ဖြစ်တတ်သေးတာပေါ့။ ဒါပေမယ့် - ဒီအတွေးတွေကို ကောင်းတဲ့အတွေးတွေဖြစ်အောင် လှည့်တွေးတတ်ဖို့က အရေးကြီးပါတယ်။
“ငါ့သားသားမီးမီးလေးတွေနဲ့အတူ နေနေရသေးသားပဲ”၊ “ဒီအခြေအနေတွေ ပြီးသွားရင် တို့သားအမိတွေအတူ ဘယ်လိုပျော်စရာတွေ လုပ်ကြမလဲ” စသည်ဖြင့် ကောင်းတဲ့အရာတွေကို လှည့်တွေးပေးတဲ့အကျင့်လေး လုပ်ထားမယ်ဆိုရင် မကောင်းတဲ့အတွေးတွေကြောင့် စိတ်ညစ်ညူးရတာ၊ ဝမ်းနည်းရတာတွေ အထိုက်အလျောက်တော့ သက်သာစေမှာပါ။
ဒီလိုအတွေးတွေက ဖေဖေမေမေတို့လို လူကြီးတွေတင် ဘယ်ဟုတ်မလဲ၊ သားသားမီးမီးတွေဆီမှာလည်း ဝင်တတ်ပြန်ရော။ ဒီတော့ - ခုဏကပြောသလို အကောင်းဖက်ကလှည့်တွေးတတ်တဲ့အကျင့်ရအောင် သားသားမီးမီးတွေနားလည်နိုင်လောက်မယ့် စကားလုံးတွေနဲ့ သေချာရှင်းပြပေးဖို့လည်း လိုတယ်နော်။
ဒီလိုကောင်းတာတွေ တွေးပေးလို့ ပတ်ဝန်းကျင်ကအခြေအနေတွေက ချက်ချင်းကြီးပြောင်းလဲမသွားဘူး ဆိုရင်တောင် ခုလိုတွေးပေးလိုက်လို့ မကောင်းတဲ့အတွေးတွေလျော့နည်းသွားတယ်ဆိုတာကိုက ကြီးမားတဲ့အောင်မြင်မှုပါပဲ။ ဒီလိုပဲ လေ့ကျင့်ယူပြီး ပြောင်းလဲသွားရမှာပါ။ ဖေဖေမေမေတို့ စိတ်ကြည်လင်နေမှ သားသားမီးမီးတွေရဲ့ ဝမ်းနည်းမှုတွေကိုလည်း ကူညီဖြေရှင်းပြီး ပယ်ဖျောက်ပေးနိုင်မှာမဟုတ်ပါလား … ။
We want to hear from you.